Bókin er 240 síður og í henni segir Mary frá ýmsu varðandi forsetann út frá sjónarhóli fjölskyldunnar. Samkvæmt frétt Dagbladet þá inniheldur bókin eitt og annað sem flokka má sem eldfimt efni sem fellur væntanlega ekki í kramið hjá forsetanum. Segir Dagbladet að á baksíðu bókarinnar komi fram að Trump hafi verið vanræktur í æsku og að það hafi sett mark sitt á hann til lífstíðar.
„Vanræksla er að vissu leyti spurning um „of mikið“ eða „ekki nóg“. Móðir Donalds veiktist þegar hann var tveggja og hálfs árs. Þá var hann um leið sviptur mikilvægustu uppsprettu traust og mannlegra samskipta. Faðir hans, Fred, var eina foreldrið sem hann hafði aðgang að. En Fred taldi það ekki í sínum verkahring að annast lítil börn og hélt áfram að vinna 12 tíma á dag, sex daga í viku, í Trump Management eins og börnin hans gætu bara séð um sig sjálf.“
Segir í útdrættinum.
Mary segir að þessi skortur á nánd við foreldrana hafi skaðað forsetann fyrir lífstíð og hafi mótað þann mann sem situr nú í Hvíta húsinu.
Í bókinni lýsir Mary ýmsu sem hún varð vitni að sem barn á heimili afa síns og ömmu í New York þar sem Donald Trump ólst upp.
„Hún lýsir martröð áfalla, eyðileggjandi samböndum og hörmulegri blöndu vanrækslu og ofbeldis.“
Segir í fréttatilkynningu frá Simon & Schuster bókaútgáfunni sem gefur bókina út.
Mary segir einnig að Trump hafi hafnað föður sínum og niðurlægt hann þegar hann fór að sýna merki þess að vera með Alzheimers. Þetta gerði hann þrátt fyrir að hann væri uppáhaldssonurinn. Í bókinni færir hún að sögn rök fyrir að „einstæðir atburðir og almennt fjölskyldumynstur hafi skapað ónýtan mann sem sitji nú í Hvíta húsinu“.
