Breska flugfélagið British Airways ætlar að segja 350 flugmönnum upp störfum á næstunni. Auk þeirra verða 300 flugmenn til viðbótar „settir í pott“ sem er hægt að endurráða þegar þörf krefur. Flestir þeirra sem munu missa vinnuna fljúga frá Gatwick í Lundúnum. Margir starfsmenn félagsins munu einnig lækka í launum um 15 prósent og enn aðrir verða að sætta sig við hlutastörf að sinni.
Bloomberg skýrir frá þessu. Þessi niðurskurður er þó langt frá upphaflegum hugmyndum félagsins en það hafði í hyggju að segja 12.000 manns upp eða um 30% starfsmanna sinna. Sú fyrirætlun var harðlega gagnrýnd af stéttarfélögum og þingmönnum.
Samgöngunefnd þingsins sakaði félagið þá um að nota heimsfaraldur kórónuveirunnar sem afsökun fyrir að reka starfsfólk.
