Súdönsk stjórnvöld hafa ákveðið að heimila þeim sem ekki eru múslimar að drekka áfengi og lög, sem gerðu refsivert að snúa baki við íslamstrú, verða numin úr gildi. Eitt ár er síðan einræðisherranum Omar al-Bashir var velt úr sessi eftir langvarandi mótmæli gegn þriggja áratuga stjórn hans.

Nasredeen Abdulbari, dómsmálaráðherra, sagði í sjónvarpsviðtali að nú megi þeir sem ekki eru múslimar drekka áfengi svo lengi sem það trufli ekki allsherjarfrið og sé ekki gert á almannafæri.

Meirihluti þjóðarinnar er múslimar en einnig er töluvert stór kristinn minnihluti í landinu.

Abdulbari sagði einnig að ríkisstjórnin ætli að afglæpavæða trúskipti þegar fólk snýst frá íslamstrú til annarrar trúar.

„Enginn hefur rétt til að saka einhvern eða þjóðfélagshóp um að vera vantrúaðan. Það ógnar örygginu í samfélaginu og leiðir af sér hefndardráp.“

Sagði ráðherrann.

Í mörgum löndum, þar sem íslamstrú er ríkjandi, eru lög í gildi sem kveða á um að dæma megi fólk til dauða ef það afneitar íslamstrú.