Ferðaþjónustuaðilar bíða að vonum spenntir eftir að ferðamönnum verði hleypt aftur til landsins enda er ferðamannaiðnaðurinn ein stærsta atvinnugrein landsins. En það gæti orðið á brattann að sækja fyrir ferðaþjónustu þegar landið opnar á nýjan leik því ríkisstjórnin hefur kynnt nýja stefnu varðandi greinina. Segja má að fjöldaferðamennska verði eitt af fórnarlömbum heimsfaraldursins.
Ríkisstjórnin ætlar nú að veðja á annarskonar ferðamennsku, fá efnaða ferðamenn til landsins í stað þess að leggja áherslu á fjölda þeirra. Einn efnaður ferðamaður leggur jafnmikið af mörkum til hagkerfisins og fimm minna efnaðir. Stefnan er sem sagt að setja gæði ofar magni og skapa nýja ímynd fyrir ferðamannaiðnað landsins. Á bak við þetta leynist sú viðurkenning að ímynd landsins sem ferðamannalands er orðin lúin, aðallega vegna ferðamanna frá Kína, Rússlandi og Indlandi en Evrópa á einnig hlut að máli enda margir Evrópubúar sem hafa heimsótt Taíland í gegnum tíðina.
Fjöldaferðamennska hefur árum saman verið þyrnir í augum yfirvalda því hún þýðir mikinn ágang á ferðamannastaði og innviði landsins en skilar ekki sérstaklega miklu í kassann. Sérstök óánægja hefur verið með kínverska ferðamenn en stór hluti af eyðslu þeirra í landinu skilar sér ekki til Taílendinga. Kínverjarnir kaupa ferðirnar heima í Kína og greiða þar. Þeir kaupa ferðir með öllu inniföldu og fara um landið í rútum í kínverskri eigu, með kínverskum leiðsögumönnum og borða á veitingastöðum í eigu Kínverja og gista á hótelum í eigu Kínverja.
