Kórónuveirufaraldurinn hefur haft mikil áhrif á efnahagslíf heimsins og því finna Bretar fyrir eins og aðrir. Auk tugþúsunda dauðsfalla af völdum veirunnar segir breski seðlabankinn að áhrifin á efnahagslíf landsins verði gríðarleg, raunar svo mikil að annað eins hafi ekki gerst í 300 ár.

Þetta kemur fram í nýrri skýrslu frá seðlabankanum. Í henni kemur fram að reiknað er með 14% samdrætti í vergri þjóðarframleiðslu vegna heimsfaraldursins.

Þetta eru mestu efnahagslegu þrengingarnar sem Bretar hafa séð síðan 1709 þegar þegar mjög kaldur vetur var í Evrópu en hann hafði gríðarleg áhrif á breskt efnahagslíf.

En þrátt fyrir að útlitið sé ekki bjart á næstunni þá er ljósi punkturinn í skýrslunni að reiknað er með að efnahagslífið taki vel við sér á næsta ári og að þá aukist verg þjóðarframleiðsla um 15%.