Ungt og heilsuhraust fólk á fertugs og fimmtugsaldri getur fengið alvarlega blóðtappa ef það er smitað af COVID-19 veirunni. Þetta segja nokkrir læknar í New York. Bandarískir fjölmiðlar hafa að undanförnu skýrt frá mörgum sjúklingum, yngri en 50 ára, sem hafa fengið alvarlega blóðtappa. Rannsóknir á þeim leiddu í ljós að þeir voru smitaðir af COVID-19.

Í umfjöllun CNN og Washington Post kemur fram að fólkið hafi verið með væg einkenni sjúkdómsins og hafi ekki verið með neina undirliggjandi sjúkdóma eða verið í áhættuhópi af öðrum ástæðum.

Læknar hjá Mount Sinai Health System í New York telja sig hafa fundið sannanir fyrir að COVID-19 valdi því að blóðið storknar á óvenulegan hátt og það geti leitt til blóðtappa og heilablóðfalla hjá sjúklingum sem hafa aldrei áður fengið slíkt.

„Það er eins og veiran geti valdið aukinni storknun í stóru æðunum sem veldur síðan alvarlegum blóðtöppum.“

Sagði taugaskurðlæknirinn Thomas Oxley í samtali við CNN. Hann sagði að skýrslur hans og starfsbræðra hans sýni að á síðustu tveimur vikum hafi þeir glímt við sjö sinnum fleiri tilfelli blóðtappa hjá fólki yngra en 50 ára en áður en faraldurinn gaus upp.