Dönsk og þýsk yfirvöld hafa lokað landamærum ríkjanna og fá aðeins þeir að fara yfir þau sem eiga brýnt erindi, til dæmis þeir sem búa í öðru landinu en starfa í hinu. Ást þykir ekki nógu mikilvæg til að hleypa fólki yfir landamærin en því kann par eitt gott ráð við.

Inga Rasmussen, 85 ára, býr í Danmörku en unnusti hennar Karsten Tüchsen, 89 ára, býr í Þýskalandi. Þau hafa verið par í um tvö ár. Áður en COVID-19 faraldurinn braust út heimsóttu þau hvort annað daglega. En lokun landamæranna lokaði á þann möguleika.

En parið lét það ekki slá sig út af laginu og hittist daglega þrátt fyrir lokuð landamæri. Þau hittast einfaldlega við landamærin við Møllehus þar sem þau eyða tíma saman í sitthvoru landinu.

Þar sitja þau og fá sér kaffi og með því, lesa blöðin og spjalla saman. En þau segjast verða að neita sér um kossa vegna faraldursins.

Á vefsíðu TV2 er hægt að sjá stutt myndband um þetta úrræðagóða par.