Að undanförnu hafa margar ungar stúlkur, sem búa í Jämtland Härjedalen í Svíþjóð, fengið símtöl frá mönnum sem segjast vera læknar. Þeir segjast hafa komist að því að stúlkurnar hafi stundað kynlíf með körlum sem eru smitaðir af HIV. Þeir segja þeim síðan að þær verði að segja þeim hverjum þær hafi stundað kynlíf með svo hægt sé að rekja smitleiðirnar og koma í veg fyrir frekara smit.

Í aðvörun sem heilbrigðisyfirvöld í Jämtland Härjedalen hafa sent frá sér eru ungar stúlkur varaðar við símtölum af þessu tagi. Tekið er fram að heilbrigðisyfirvöld sendi yfirleitt bréf ef þörf þykir á að fá fólk til að mæta til sýnatöku. Það geti þó gerst einstaka sinnum að hringt sé í fólk en þá sé ekki spurt um rekkjunauta. Enginn þurfi að skýra frá rekkjunautum sínum fyrr en viðkomandi hafi sjálfur greinst með kynsjúkdóm.

Stúlkurnar, sem hafa svarað fyrrgreindum símtölum, vissu ekki að þau voru tekin upp og síðan birt á samfélagsmiðlum og víðar á netinu.