Rúmlega 100.000 COVID-19-sjúklingar liggja nú á bandarískum sjúkrahúsum og veldur það að vonum miklu álagi á sjúkrahúsin. Fjöldinn hefur aldrei verið meiri og hefur tvöfaldast á aðeins einum mánuði. Þetta veldur því að mikill skortur er á læknum og er nú biðlað til lækna og hjúkrunarfræðinga á eftirlaunum að gefa sig fram til starfa.

Mörg sjúkrahús reyna einnig að ráða nema og nýútskrifaða kandídata til starfa þrátt fyrir að þeir hafi ekki enn fengið útgefin starfsleyfi. Eru góð laun í boði í þessum örvæntingarfullu tilraunum sjúkrahúsanna til að fá starfsfólk til starfa.

Hjúkrunarfræðingar um allt land brenna í sífellt meiri mæli upp vegna álags í starfi og hefur bandaríska sjúkdómastofnunin, CDC, sent frá sér aðvörun vegna þessa. Robert Redfield, forstjóri CDC, segir að eins og staðan er núna þá stefni í að desember, janúar og febrúar verði erfiðir mánuðir. „Ég held að þetta verði erfiðustu mánuðirnir í sögu bandarískrar lýðheilsusögu,“ sagði hann að sögn AP.