Útreikningar danska menntamálaráðuneytisins sýna að útgjöld ríkisins til námsmanna frá öðrum ESB-ríkjum og EES-ríkjum muni verða um 650 milljónir danskra króna árið 2023. Það er 200 milljónum meira en þingflokkarnir, sem standa að baki samningi um námsstyrki til erlendra námsmanna, vilja sætta sig við. Um svokallað SU, Statens Uddannelsesstøtte, er að ræða en í því felst að námsmenn geta fengið fjárhagslegan styrk frá ríkinu á meðan þeir stunda nám sitt. Að auki geta þeir tekið námslán ef þeir telja þörf á því.

Í fréttatilkynningu frá ráðuneytinu kemur fram að það valdi Ane Halsboe-Jørgensen, menntamálaráðherra, miklum áhyggjum að þessi útgjöld haldi áfram að vaxa þrátt fyrir aðgerðir fyrri ríkisstjórnar til að sporna við útgjaldaaukningunni.

Ráðherrann hefur því tilkynnt fulltrúum flokkanna, sem stóðu að fyrrgreindum samningi, um þetta þannig að hægt verði að finna lausn á þessu.

Íslenskir námsmenn geta notið góðs af SU ef þeir uppfylla ákveðin skilyrði um atvinnuþátttöku og hafa margir nýtt sér þetta enda um styrk að ræða en ekki lán eins og hjá Menntasjóði námsmanna.