Svona getur atburðarásin verið þegar tölvuþrjótar beina spjótum sínum að fyrirtækjum. Samkvæmt nýju áhættumati frá miðstöð tölvuöryggis, sem er stofnun á vegum leyniþjónustu danska hersins, þá eru tölvuþrjótar í sífellt meiri mæli farnir að beina spjótum sínum að mannauðsdeildum fyrirtækja með því að senda inn falskar atvinnuumsóknir.
Oft fylgir ferilskrá með atvinnuumsókn, meðmæli eða eitthvað annað sem kann að eiga við. Tölvuþrjótar fela oft spilliforrit í þessum fylgigögnum.
Þetta gera þeir í þeirri von að þeir sem fara með mannauðsmálin opni tölvupósta þeirra og viðhengi þegar kemur að yfirferð á umsóknum. Ekstra Bladet skýrir frá þessu.
Sem dæmi er nefnt að þessari aðferð hafi verið beitt í Bangladess þar sem maður, sem kallaði sig Rasel Ahlam, sendi atvinnuumsókn, sem hann hafði komið spilliforriti fyrir í, til seðlabanka landsins. Viðtakandinn smellti á hlekk í tölvupóstinum og nokkrum mánuðum síðar höfðu tölvuþrjótar stolið 81 milljón dollara frá bankanum.
