Um klukkan 6 að morgni 1. nóvember heyrðu vitni borhljóð berast úr kjallara tollstöðvar í Duisburg í Þýskalandi. Þar voru þjófar á ferð. Þeir boruðu gat á vegg á milli peningahvelfingar og herbergis í kjallaranum. Úr hvelfingunni stálu þeir 6,5 milljónum evra í reiðufé og létu sig hverfa á brott.

Bild skýrir frá þessu. Augljóst er að innbrotið var vel skipulagt og að fagmenn voru að verki. Vitað er að klukkan 10.45 yfirgáfu þrír dökkklæddir menn bygginguna og óku á brott í hvítum sendiferðabíl og höfðu peningana á brott með sér. Vitni sá einnig til ferða manns við húsið á svipuðum tíma og virtist sem hann stæði vörð. Hann ók síðan á brott í öðrum bíl þegar þremenningarnari voru farnir.

Lögreglan hefur heitið 100.000 evrum í verðlaun fyrir upplýsingar sem leiða til handtöku þjófanna.