Kanadísk yfirvöld hafa gert áætlunum brottflutning allt að 300.000 kanadískra ríkisborgara frá Hong Kong ef nauðsyn krefur. Embættismenn segja að þeir geti hins vegar lítið gert til að aðstoða lýðræðissinna sem leita skjóls undan kínverskum yfirvöldum.
Samkvæmt frétt The Guardian þá sagði Jeff Nankivell, aðalræðismaður Kanada í Hong Kong og Macau, þingnefnd að stjórnvöld hafi gert áætlun um hvernig þau geti aðstoðað tæplega 300.000 Kanadamenn sem búa í Hong Kong ef staðan í héraðinu versnar enn frekar.
„Við erum með nákvæma áætlun og nauðsynlegar bjargir til staðar og getum brugðist við margvíslegum aðstæðum sem kalla á skjótan brottflutning margra Kanadamanna,“
sagði hann þingnefndinni.
„Eins og staðan er núna virðast líkurnar á slíkum aðstæðum vera litlar en það er starf okkar að vera undirbúin undir verstu hugsanlegu aðstæður.“
Það þykir hafa gefið þessum áætlunum aukið vægi að kínversk stjórnvöld innleiddu stranga öryggislöggjöf í Hong Kong í sumar til að berja niður mótmæli lýðræðissinna.
Líklegt þykir að ummæli Nankivell muni auka spennuna á milli Kína og Kanada enn frekar. Kínverjar hafa verið mjög ósáttir við Kanadamenn eftir að kanadísk stjórnvöld lýstu yfir stuðningi við aðgerðasinna í Hong Kong og sagði kínverski sendiherrann í Kanada af því tilefni að „íhlutun í kínversk innanríkismál“ geti hugsanlega stefnt „heilsu og öryggi“ kanadískra ríkisborgara, sem búa á svæðinu, í hættu.
