Suður-kóreskir hermenn handtóku Norður-Kóreumann sem er talið að hafi verið að flýja til suðurs yfir vel víggirt landamæri Kóreuríkjanna. Hermenn sáu til ferða mannsins á þriðjudagskvöldið þegar hann komst yfir gaddavírsgirðingu. Hann var handtekinn um 80 mínútum síðar eftir að aftur sást til hans við austurenda hlutlausa svæðisins sem er tæplega 250 km að lengd og þakið jarðsprengjum.

Ekki liggur fyrir hvort maðurinn er hermaður eða óbreyttur borgari en hann var ekki í einkennisbúningi. Í yfirlýsingu frá suður-kóresku herstjórninni kemur fram að rannsókn sé hafin á málinu til að komast að hver maðurinn er og hvernig hann hafi komist inn á hlutlausa svæðið og hvort hann hafi verið að flýja land.

Á síðustu tveimur áratugum hafa um 31.000 Norður-Kóreumenn flúið til suðurs en mjög fáir hafa farið yfir hlutlausa beltið. Flestir fara til Kína og þaðan í gegnum þriðja land til að komast til Suður-Kóreu, Taíland verður oft fyrir valinu.

Fyrir tveimur árum tókst norður-kóreskum hermanni að flýja yfir hlutlausa beltið til suðurs en ári áður var annar skotinn af félögum sínum þegar hann reyndi að komast til suðurs.