Niðurstöður nýrrar rannsóknar benda til að kórónuveiran, sem veldur COVID-19, geti orsakað heyrnarleysi, að hluta eða algjörlega, hjá þeim sem smitast af veirunni. Áður var vitað að veiran getur haft áhrif á bragð- og þefskyn fólks.

The Guardian skýrir frá þessu. Fram kemur að heyrnarskerðing geti verið varanleg afleiðing smits. Dæmi er tekið um 45 ára karlmann, sem þjáðist af astma, sem var lagður inn á gjörgæsludeild með COVID-19.

Viku eftir að hann var útskrifaður af sjúkrahúsi fékk hann suð í vinstra eyrað og síðan missti hann heyrn að hluta. Hann fékk sterameðferð í kjölfarið og hefur endurheimt hluta af heyrninni. Þetta er fyrsta svona tilfellið í Bretlandi en ekki í heiminum.

Niðurstöður annarrar rannsóknar, sem Kevin Munro prófessor við Manchester University, gerði á 121 kórónuveirusmituðum einstaklingi kom í ljós að 16 höfðu tapað heyrn að hluta eftir að þeir voru útskrifaðir af sjúkrahúsi.

Ekki er þó alveg öruggt að það sé kórónuveiran sem á sök á heyrnartapi en það verður nú rannsakað nánar.