Málið þykir býsna sérstakt og vilja margir meina að það varpi ljósi á stórgallað réttarfarskerfi í Bandaríkjunum þar sem einstaklingar geta fengið mjög þunga dóma fyrir litlar sakir.
Willie var gripinn með farsíma í fórum sínum í ágúst 2018, en það gerðist eftir að hann spurði fangavörð hvort hann gæti skellt símanum í hleðslu. Síminn var að sjálfsögðu haldlagður og fór málið sína mál í dómskerfinu uns dómur féll á dögunum: Niðurstaðan var tólf ára fangelsi.
James Maxwell, dómari í málinu, segir að Willie geti prísað sig sælan að hafa ekki fengið enn þyngri dóm, en hámarksrefsing fyrir brot af þessu tagi er 15 ára fangelsi. Hann hefði vel getað fengið slíkan dóm í ljósi fyrri dóma sem flestir eru fyrir þjófnað og innbrot.
Annar dómari, Leslie King, er þó á öðru máli en í grein sem hann skrifaði á dögunum um dóminn segir hann að hann varpi ljósi á stórgallað kerfi. Í eðli sínu sé ekki hægt að gagnrýna dóminn, því dómari hafi haldið sig innan ramma laganna, heldur miklu frekar lögin sem dómurinn byggir á.
Þá segir hann að margt bendi til þess að forsvarsmenn Newton County-fangelsisins beri sjálfir ábyrgð. Þannig hafi Willie komist með símann inn í fangelsið því ekki hafi verið leitað á honum áður en hann fór inn.
Málið hefur vakið nokkra athygli vestanhafs og segist dálkahöfundur Miami Herald, Leonard Pitts Jr. telja að þungur dómur hafi talsvert með þá staðreynd að gera að Willie er blökkumaður.
