Miklir þurrkar í Taílandi valda því nú að yfirvöld í höfuðborginni Bangkok þurfa að deila vatni út til borgarbúa og er það nú flutt í tankbílum til íbúanna. Fólk er beðið um að spara vatn og sérstaklega er það beðið um að fækka baðferðum. Þurrkarnir valda því að saltvatn úr Taílandsflóa streymir nú inn í landið eftir ánni Chao Praya sem er ein mikilvægasta uppspretta drykkjarvatns landsmanna. Það er því saltvatn sem kemur úr krönum borgarbúa.

Það eykur enn á vandræðin að þurrkatímabilið, sem hófst í nóvember og ætti að vara fram í apríl í venjulegu árferði, mun að þessu sinni hugsanlega vara til og með júní. Yfirvöld hafa nú lýst yfir að þurrkar herji á 14 af 76 héruðum landsins.

Allt getur þetta haft mjög slæm áhrif á landbúnað, til dæmis hrísgrjónaræktun en hún er mjög vatnskrefjandi.

Margar af stærstu borgum Asíu standa á láglendi við strendur og eru því sérstaklega viðkvæmar fyrir hækkandi sjávarborði og öfgafullum veðurfyrirbrigðum á borð við hitabeltisstorma og fellibylji. Má þar nefna Mumbai, Shanghai, Ho Chi Minh City og Jakarta. Í þessum borgum gætu einnig skapast vandræði af völdum saltvatns í framtíðinni.