Kórónuveiran hefur sett margt úr skorðum í samfélaginu og margir eru logandi hræddir við að smitast af veirunni. Það hefur síðan í för með sér að umburðarlyndi sumra er minna en ella. Það á væntanlega við í líkamsárásarmáli sem kom upp í Faaborg á Fjóni í Danmörku nýlega.

Þar var kona á gangi með unnusta sínum. Þegar þau komu að bifreiðastæði einu í bænum hnerraði konan tvisvar. Þetta fór vægast sagt illa í nærstaddan mann sem gekk að konunni og sló hana tvisvar með krepptum hnefa í andlitið. Hann lét sig síðan hverfa á brott.

Konan hlaut áverka í andliti og var flutt á sjúkrahús. Enginn hefur verið handtekinn vegna málsins en lögreglan vinnur að rannsókn þess og hefur greinargóða lýsingu á ofbeldismanninum.