Breskur maður, Nathan Francis Wyatt, var nýlega dæmdur í fimm ára fangelsi í Bandaríkjunum. Hann játaði að hafa haft í hyggju að stela persónuupplýsingum fólks og að hafa stundað tölvuglæpi. Hann er þekktur undir heitinu „Dark Overlord“ (Svarti lávarðurinn).

Samkvæmt frétt Sky þá var Wyatt einnig gert að greiða fórnarlömbum sínum 1,5 milljónir dala í bætur.

Hann var handtekinn af bresku lögreglunni 2016 vegna ótengds máls en þá var verið að rannsaka innbrot í iCloud-reikning Pippa Matthews, systur Katrínar hertogaynju og eiginkonu Vilhjálms ríkisarfa.

Wyatt, sem er þriggja barna faðir, var sleppt í september 2017 án þess að frekari eftirmálar yrðu. Hann var síðan handtekinn aftur og fluttur í fangelsi til afplánunar refsinga fyrir margvísleg brot. Hann barðist gegn framsali til Bandaríkjanna en dómari heimilaði framsalið á síðasta ári.

Í Bandaríkjunum var hann ákærður fyrir að stela læknaskýrslum, upplýsingum frá bandarískum fyrirtækjum og að hafa krafist greiðslu í Bitcoin fyrir að skila þessum upplýsingum aftur. Engin fyrirtæki greiddu honum en urðu fyrir tjóni vegna taps á gögnum.

Fyrir dómi kom fram að Wyatt hafi stofnað aðganga á Twitter og Paypal til að taka við greiðslum og eiga í samskiptum við fórnarlömb sín.