Á sunnudaginn létust brasilísku vinkonurnar Monique Medeiros, 19 ára, og Bruna Velasquez, 18 ára, þegar þær höfðu laumast að afskekktum fossi i Salto Caveirar í Lages. Svæðið í kringum fossana þykir mjög óöruggt og hafa yfirvöld bannað fólki að fara þangað því það sé beinlínis lífshættulegt.

Brasilíska sjónvarpsstöðin RIC Mais segir að samt sem áður sé svæðið vinsælt meðal almennings sem fari þangað til að synda.

Vinkonurnar tóku myndir af sér á toppi fossins. Þær birtu myndina síðan á Instagram en aðeins nokkrum mínútum síðar hröpuðu þær báðar til bana en fallið var um 30 metrar.

Dagblaðið UOL hefur eftir talsmanni lögreglunnar að vinkonurnar hafi staðið á barmi fossins þegar annarri skrikaði fótur og rann út fyrir. Hin reyndi þá að koma henni til aðstoðar en rann einnig.

Á myndinni, sem vinkonurnar birtu á Instagram, sést fólk í vatninu fyrir neðan fossinn. Það voru því mörg vitni að slysinu. Strax var hringt í neyðarlínuna.

Bruna var úrskurðuð látin á vettvangi en Monique lést á sjúkrahúsi skömmu eftir að komið var með hana þangað.

Aðstæður til björgunar voru erfiðar vegna aðstæðna á vettvangi og þurfti að fá aðstoð frá herlögreglunni og þyrlu á hennar vegum.