Tannlæknir er nú fyrir rétti í Osló en hann er ákærður fyrir að hafa nauðgað sambýliskonu sinni ítrekað á árunum 2014 til 2019. Hann er grunaður um að hafa gefið konunni sterk deyfi- og svefnlyf, sem hann tók með heim úr vinnunni, og að hafa síðan nauðgað henni á meðan hún var meðvitundarlaus.

Samkvæmt frétt TV2 þá hafði konan ekki hugmynd um það sem gerðist fyrr en á síðasta ári.

Samkvæmt ákærunni þá hafði maðurinn aðgang að sterkum deyfi- og svefnlyfjum í starfi sínu. Þar á meðal rohypnol sem er oft sagt vera „nauðgunarlyf“ því sá sem innbyrðir það missir yfirleitt meðvitund.

Það var tannlæknirinn sjálfur sem gaf sig fram við lögregluna á síðasta ári til að játa brotin á sig. Það gerði hann eftir að sambýliskona hans hafði rætt þetta við hann en hana var farið að gruna eitt og annað. Maðurinn skýrði frá brotum sínum í smáatriðum.

Í ákærunni er greint frá meintum brotum mannsins í smáatriðum. Hann er til dæmis sagður hafa notað ilmvatnsglas, sprautur og spartlspaða við sumar nauðganirnar.