16 ára piltur lést nýlega þegar hann var að snorkla á Spáni. Talið er að hann hafi látist samstundis þegar fjörsungur stakk hann. Í fyrstu var talið að pilturinn hefði drukknað en frekari rannsóknir hafa leitt í ljós að líklega hafi baneitraður fjörsungur orðið honum að bana.

Þessi hörmulegi atburður átti sér stað á vinsælli strönd í Costa Brava. The Mirror skýrir frá þessu.

Það voru strandgestir sem komu auga á líflausan piltinn í sjónum og komu honum í land en ekki reyndist hægt að bjarga lífi hans.

Það voru stungumerki á líkama hans sem vöktu grun um að hann hefði verið stunginn af fjörsungi eða öllu heldur blettóttum fjörsungi (Trachinus Araneus). Fiskar af þessari tegund geta orðið allt að 45 sm á lengd og eru með eitraða brodda á bakinu.