Ferðamannaiðnaðurinn hefur vaxið gríðarlega mikið víða um heim á undanförnum árum og nú vilja yfirvöld í Sádi-Arabíu fá sinn skerf af kökunni. Hyggjast yfirvöld eyða sem svarar til um 60.000 milljörðum íslenskra króna til búa til ferðamannaparadís í landinu.

The Guardian skýrir frá þessu. En þessi ferðamannaparadís verður ekki í þeim stíl sem við Íslendingar eigum að venjast í sunnanverðri Evrópu. Áfengi verður ekki í boði og konum verður ekki heimilt að sóla sig í bikiníum.

En hvernig á þá að lokka ferðamenn til þessa strangtrúaða íslamska lands? Það á til dæmis að gera með því að reisa nýja borg þar sem verða hvítar strendur, tungl (auðvitað búið til af mönnum), drónaleigubílar og vélmenni sem þjóna fólki.

The Guardian segir að það sé Mohammed bin Salman, krónprins Sádi-Arabíu sem vill leggja í þessa fjárfestingu. Peningarnir verða að sjálfsögðu sóttir í olíuauð landsins.

Krónprinsinn segir að það sé ekki til umræðu að konur geti sleppt að hylja axlir og hné á opinberum stöðum en viðurkennir um leið að það sé ekki einfalt mál að skapa ferðamannaparadís í landinu því það sé of heitt þar þegar sólin er hátt á lofti og ekki sé hægt að treysta á vindkælingu. En svo má velta fyrir sér hvort það dragi ekki einnig úr áhuga væntanlegra ferðamanna ef þeir geta ekki keypt sér áfengi.