Nýlega var 29 ára Svíi fundinn sekur um ölvun við akstur og eignaspjöll eftir að hann ók bíl sínum á stólpa og tvo bíla. Maðurinn, sem er frá Trollhättan, var svo ofurölvi og röflandi þegar lögreglan handtók hann að lögreglumenn töldu í fyrstu að hann talaði dönsku.

Ttela skýrir frá þessu. Auk fyrrgreindra brota var maðurinn fundinn sekur um að hafa verið með hnífa og aðra hættulega hluti í bíl sínum.

Samkvæmt frétt Ttela þá skildu lögreglumennirnir í fyrstu ekki hvað maðurinn sagði og héldu að hann talaði dönsku. Þeir áttuðu sig þó fljótlega á að hann var bara svo ofurölvi að hann gat eiginlega ekki talað.

Maðurinn sagði lögreglunni síðar, þegar hann var aftur orðinn mælandi á sænska tungu, að hann hefði verið í heimsókn hjá vini sínum þar sem hann hefði drukkið mikið magn af mörgum áfengistegundum. Eftir það mundi hann ekkert.

Hann var dæmdur í eins mánaðar fangelsi og til að greiða bætur vegna þess eignatjóns sem hann var valdur að.