Martin D-18E gítar frá 1959 seldist á sem svarar til 830 milljóna íslenskra króna á uppboði hjá Juliens‘s Auctions í Beverly Hills í Los Angeles á laugardaginn. Kurt Cobain, söngvari Nirvana, lék á gítarinn skömmu áður en hann lést.

Cobain lék á gítarinn við upptökur á MTV Unplugged nokkrum mánuðum áður en hann lést 1994. Það var Peter Freedman sem keypti gítarinn á uppboðinu og greiddi 6 milljónir dollara fyrir hann. Upphafsboðið var 1 milljón dollara.

Gítar, sem Prince átti, var einnig seldur á uppboðinu en mun lægra verð fékkst fyrir hann eða 563.500 dollarar. Það var þó ekki slæm sala því reiknað var með að 200.000 dollarar myndu að hámarki fást fyrir hann.