Þann 6. apríl ákvað hann, með góðri aðstoð dóttur sinnar, að safna peningum til stuðnings NHS Charities, sem eru góðgerðarsamtök breska heilbrigðiskerfisins, sem styðja bæði starfsfólk og sjúklinga.
Hann ákvað að ganga að minnsta kosti 100 hringi í kringum húsið sitt með aðstoð göngugrindar sinnar. Með þessu vonaðist hann til að safna 1.000 pundum (sem svara til um 180.000 króna) til að færa samtökunum á afmælisdeginum sínum. Fjölmiðlar komust fljótt á snoðir um þetta og þá fór boltinn að rúlla.
Síðan 6. apríl hefur Tom safnað 30 milljónum punda en það svarar til um 5,5 milljarða króna. Engum sjálfboðaliða hefur nokkru sinni tekist að safna svona miklu fé á Bretlandseyjum.
Breska póstþjónustan hefur nú þegar gefið út frímerki til að hylla Tom Moore. Pósthúsið í South Midlands, þar sem hann býr, þurfti að taka eina flokkunarvél undir það eitt að flokka póst til Tom en í gær höfðu honum borist 125.000 afmæliskveðjur með póstinum. Leikfimisalur í grunnskóla hefur verið tekin undir öll kortin.
En þar með er ekki öll sagan sögð því fyrir tíu dögum tók Tom upp lagið „You‘ll never walk alone‘ með söngvaranum Michael Ball og kór heilbrigðisstarfsmanna. Lagði situr í efsta sæti breska vinsældalistans en það hefur selst í 82.000 eintökum og verið hlaðið niður rúmlega milljón sinnum af YouTube. Tom er elsti maðurinn sem setið hefur á toppi vinsældalistans. Ágóðinn af sölu lagsins fer einnig í söfnunina.
Í tilefni dagsins flugu flugvélar frá breska hernum heiðursflug yfir heimili Tom í dag og hann var hækkaður í tign og er nú ofursti að tign.
Hann barðist með breska hernum í síðari heimsstyrjöldinni og fékk þrjár orður fyrir framgöngu sína.
