Í síðasta mánuði hvarf Gretchen Anthony frá heimili sínu í Flórída í Bandaríkjunum. Hún hafði skömmu áður sótt um skilnað frá eiginmanni sínum, David. Eftir að Gretchen hvarf sagði fjölskylda hennar lögreglunni að hún hefði sent þeim undarleg skilaboð. Í þeim stóð að hún væri smituð af COVID-19 veirunni og væri mjög veik og væri á gjörgæsludeild sjúkrahúss í Flórída. Í öðrum skilaboðum stóð að hún hefði verið flutt á annað sjúkrahús því hún þyrfti að vera í öndunarvél.

Þegar fjölskylda hennar hafði samband við sjúkrahúsin kannaðist enginn við að Gretchen væri þar. Washington Post skýrir frá þessu. Fjölskyldan hafði þá samband við lögregluna sem hóf rannsókn á málinu.

Nú hefur David verið handtekinn en hann er grunaður um að hafa myrt Gretchen og sent skilaboð úr síma hennar til fjölskyldu hennar. Lík Gretchen hefur ekki fundist.

David lét sig hverfa þegar rannsókn lögreglunnar hófst en hann fannst í Nýju Mexíkó og var handtekinn og situr nú í gæsluvarðhaldi.