Sky og The Times skýra frá þessu í dag. Haft er eftir Sarah Gilbert, prófessor í bólusetningarfræðum við Oxford háskólann, að ef allt gengur að óskum geti bóluefnið verið tilbúið í september. Gilbert er í forsvari fyrir teymið. Hún sagðist vera „80% örugg um“ að bóluefnið virki og að tilraunir með það hefjist á fólki á næstu tveimur vikum.
„Þetta er ekki bara tilfinning og með hverri vikunni sem líður höfum við fleiri gögn til að vinna úr.“
Sagði hún í samtali við The Times.
Þegar hún var spurð beint hvort bóluefni gæti verið tilbúið í september svaraði hún að það væri sú tímasetning sem unnið væri út frá.
„Ef allt gengur að óskum.“
Bætti hún við og lagði áherslu á að engin trygging sé fyrir að verkefnið gangi upp.
Tilraunir með bóluefnið velta á því að þar sem tilraunirnar fari fram sé frekar mikið smit meðal almennings og að smit eigi sér stað á ákveðnum hraða. Þetta er nauðsynlegt til að hægt sé að afla nægilegra gagna frá sjúklingum til að vinna úr og komast að hvort bóluefnið virkar. Það gerir vísindamönnunum erfitt fyrir að mörgum samfélögum hefur verið lokað að stórum hluta til að draga úr útbreiðslu veirunnar.
Gilbert hefur árum saman unnið að rannsóknum á bóluefnum gegn veirum sem eru í kórónufjölskyldunni eins og COVID-19. Hún og samstarfsfólk hennar hafa nú þegar prófað bóluefnið á músum en nú er komið að næsta skrefi, tilraunum á fólki. Breska ríkisstjórnin hefur veitt miklu fé til verkefnis teymisins.
