Noah Woods, fimm ára, hefur verið útnefndur heiðursbrunavörður og mun fá sérstök heiðursverðlaun fyrir hetjulega björgunardáð hans nýlega. Hann var sofandi, ásamt sjö öðrum fjölskyldumeðlimum, á heimili sínu í Bartow County í Georgíu í Bandaríkjunum þegar hann vaknaði við reyk og eld í herberginu sem hann deildi með tveggja ára systur sinni.

Hann flýtti sér út úr rúminu, greip systur sína og yfirgaf húsið um eina mögulega útganginn, opinn glugga. En þar með var hann ekki hættur því hann fór aftur inn í húsið og sótti hund fjölskyldunnar og kom honum í öruggt skjól. Hann hljóp síðan heim til frænda síns, sem býr í næsta húsi, til að fá aðstoð. Þeir fóru síðan og vöktu restina af fjölskyldunni. Allir komust út heilir á húfi.

„Við höfum áður séð börn aðvara fjölskyldur sínar en að fimm ára sé nægilega meðvitaður til að gera þetta . . . það er ansi sérstakt.“

Sagði Dwayne Jamison, slökkviliðsstjóri í Bartow County í samtali við CNN.

Hann sagði að eldurinn hafi kviknað út frá innstungu í svefnherbergi Noah og systur hans, of mikið álag hafi verið á henni. Noah og fjórir aðrir fjölskyldumeðlimir fengu aðhlynningu vegna reykeitrunar og minniháttar brunasára.