Sacha Baron Cohen varpaði fram þeirri spurningu hvers vegna Mark Zuckerberg, forstjóri Facebook, mætti stjórna því hvaða upplýsingar 2,5 milljarðar manna fá, á sama tíma og einn aðili myndi ekki fá leyfi til þess að hafa jafn mikil völd yfir annað hvort vatnsbirgðum eða rafmagni. Hann sagði einnig að miðlinum ætti ekki að vera stjórnað af keisara, yfirvöld ættu að hafa eftirlit með honum.
Sacha Baron Cohen hefur verið mjög gagnrýninn á samfélagsmiðla þar á meðal Twitter og YouTube og hefur lýst miðlunum sem „mestu áróðursvél sögunnar“. Mikið af gagnrýni hans hefur verið beint gegn Facebook, en hann segir að miðillinn hagnist á því að sannreyna ekki það sem er sett fram í auglýsingum stjórnmálaflokka. Facebook hefur varið þessa stefnu sína og hefur sagt að hatursorðræða sé bönnuð á miðlinum, sem og allir þeir sem hvetja til ofbeldis. Fyrirtækið hefur ekki brugðist við ummælum Sacha Baron Cohen eða Elon Musk.
Elon Musk tók það ekki fram hvers vegna honum finnst Facebook vera hallærislegt, en þetta er ekki í fyrsta sinn sem hann gagnrýnir miðilinn, eða stofnanda þess Mark Zuckerberg, opinberlega. Árið 2018 eyddi hann Facebook síðum fyrirtækja sinna, Tesla og SpaceX, eftir að í ljós kom að Cambridge Analytica hafði komist yfir persónuupplýsingar 87 milljóna Facebook notenda, án vitneskju þeirra.
Musk, Tesla og SpaceX, eru þó enn með síður á Instagram, þrátt fyrir að Instagram sé í eigu Facebook. Hann segir að miðillinn sé sennilega í lagi þar sem hann sé ekki of tengdur Facebook.
Sacha Baron Cohen og Elon Musk eru ekki þeir einu sem gagnrýnt hafa Facebook, fyrr í þessum mánuði tilkynnti rithöfundurinn Stephen King að hann værri hættur á Facebook, vegna rangra upplýsinga og þess að friðhelgi einkalífsins væri ekki nógu vel varin.
