Nú standa yfir réttarhöld í þingrétti í Osló yfir 55 ára Norðmanni sem er ákærður fyrir ólöglega skotvopna- og skotfæraeign. Þegar lögreglan gerði húsleit á heimili hans og móður hans í Skien haustið 2016 fann hún 76 skotvopn og rúmlega 79.000 skot. Auk þess fundust 2 kíló af dýnamíti, 16 kíló af púðri, 1 lítri af saltpétri og 25,7 lítrar af brennisteinssýru.

Dagbladet skýrir frá þessu. Hefur blaðið eftir manninum að hann reikni með þungum dómi, að minnsta kosti eins árs fangelsi.

Á heimilinu fundust 18 skammbyssur, 39 haglabyssur (þar af tvær afsagaðar), 16 rifflar og 3 sjálfvirkar byssur. Búið var að afmá raðnúmer af stórum hluta vopnanna. Sum vopnanna höfðu verið afskráð sem ónýt. Einnig fundust hljóðdeyfar og útbúnaður til að búa til skot. Stór hluti af skotfærunum reyndist vera frá norska hernum.

Maðurinn játaði sök fyrir dómi.

Dómur verður kveðinn upp yfir honum á næstu dögum.