Það hefur lengi verið rætt og ritað um húðlit Donald Trump Bandaríkjaforseta. Það er eiginlega ekki hægt að mæla á móti því að hann virðist oft vera appelsínugulur. Margar skýringar hafa verið settar fram á þessum sérstaka húðlit forsetans en hann ræddi þetta sjálfur á fundi með stuðningsfólki repúblikanaflokksins í Baltimore á fimmutdaginn.

CNN og The Hill greina frá þessu. Fram kemur að Trump kenni sparperum um þetta, það sé þeim að kenna að húð hans virðist appelsínugul. Þó er tekið fram að Trump hafi verið ansi sjálfshæðinn þegar hann ræddi þetta. Hann sagði að perurnar vörpuðu slæmri birtu á hann og væru alltof dýrar:

„Fólk spurði hver tilgangurinn væri með þessu ljósaperum. Ég sagði: „Þetta er sagan,“ og ég kannaði þetta: „Perurnar, sem við erum neydd til að nota, lýsa illa og það er það sem skiptir mig mestu máli.““

Sagði hann glottandi og bætti við:

„Ég virðist alltaf vera appelsínugulur í birtunni frá þeim.“

Og bætti við að áheyrendurnir virtust líka vera appelsínugulir. Síðan gagnrýndi hann, öllu alvarlegri í bragði, sparperur fyrir að vera miklu dýrari en gömlu glóperurnar.

Fyrr í mánuðinum afnam ríkisstjórn Trump samþykkt frá valdatíma Barack Obama sem kvað á um að gömlu glóperurnar yrðu smátt og smátt teknar úr notkun. Þær eru ódýrari en verri fyrir umhverfið.