Á fimmtudag í síðustu viku skildu foreldrar þrjú börn sín eftir í bíl utan við verslun í Philadelphia í Pennsylvania í Bandaríkjunum og fóru inn að versla. Þegar foreldrarnir komu út úr versluninni sáu þau á eftir bíl sínum með börnin innanborðs. Þau hlupu á eftir bílnum og náðu honum á næstu gatnamótum þar sem ökumaðurinn hafði orðið að stöðva á rauðu ljósi.

Þar drógu þau þjófinn út úr bílnum að því er segir í frétt CNN. Bílþjófurinn réðst þá á föðurinn og hljóp síðan á brott. En hópur nærstaddra hafði séð hvað gerðist og greip þá inn í atburðarásina. Fólkið náði bílþjófinum og barði hann svo illa að hann lést. Hann var úrskurðaður látinn við komuna á sjúkrahús.

CNN hefur eftir Jason Smith, lögreglustjóra í Philadelphia, að hann styðji ekki að fólk grípi til aðgerða sem þessara, lögreglan eigi að sjá um svona mál.

Lögreglan er með myndbandsupptökur af atburðinum og reynir nú að bera kennsl á fólkið sem barði hinn 54 ára bílþjóf í hel.

Börnin þrjú sluppu ómeidd frá þessu.