Síðdegis á þriðjudaginn  var ráðist á konu á sjötugsaldri í kirkjugarði í Haugesund í Noregi. Henni voru veittir áverkar og lést hún af völdum þeirra aðfaranótt miðvikudags. Norskir fjölmiðlar segja að exi hafi verið notuð við árásina en lögreglan hefur ekki staðfest það.

Karlmaður á fimmtugsaldri var handtekinn á vettvangi en hann er grunaður um að hafa ráðist á konuna. Lögreglan segir að ekki sé að sjá að fólkið hafi þekkst eða tengst á nokkurn hátt. Svo virðist sem tilviljun hafi ráðið því að ráðist var á þessa konu.

Lögreglan rannsakar nú hvort innbrotstilraun, fyrr um daginn, tengist málinu en þar var exi notuð. Hinn handtekni hefur áður komið við sögu  lögreglunnar vegna ýmissa mála, þar á meðal margra ofbeldisbrota. Hann hefur hlotið um 40 dóma í gegnum árin.