Þann 12. janúar uppgötvaði bíleigandi að eitthvað dularfullt var undir bíl hans þar sem honum var lagt á stæði í Hässelholm í Svíþjóð. Eigandinn tilkynnti lögreglunni um þetta og var svæðið girt af, íbúðarhús í nágrenninu voru rýmd og sprengjusérfræðingar fengnir á staðinn.

Þegar lögreglumenn gengu að bílnum til að rannsaka hann og kíktu undir hann reyndi sá sem hafði komið hlutnum, sem var sprengja, fyrir að sprengja hana með því að hringja í hana. En af óþekktum ástæðum virkaði það ekki og sprengjan sprakk ekki.

Aftonbladet skýrir frá þessu. Blaðið segir að lögreglan vilji lítið tjá sig um málið annað en að um virka sprengju hafi verið að ræða.

Aftonbladet segist hafa heimildir fyrir að sprengjumaðurinn hafi hringt í sprengjuna til að sprengja hana þegar fyrstu lögreglumennirnir komu á vettvang og voru að rannsaka bílinn.