Evrópulögreglan Europol og aðildarríki hennar hafa að undanförnu látið til sín taka í baráttunni gegn peningaþvætti. 228 hafa verið handteknir, kennsl hafa verið borin á 3.833 peningasmyglara og rannsókn er hafin á 1.025 málum tengdum peningaþvætti.

Í fréttatilkynningu frá Europol segir að aðgerðin hafi staðið yfir í september, október og nóvember og hafi 31 ríki tekið þátt í henni. Eitt meginmarkmið aðgerðarinnar er sagt hafa verið að bera kennsl á svokallaða „money mules“ en það er fólk sem tekur þátt í ýmsu tengdu peningaþvætti og oft ekki af fúsum og frjálsum vilja. Þetta fólk flytur peninga á milli bankareikninga eða reiðufé á milli landa.

Í aðgerðinni naut lögreglan aðstoðar 650 banka og fjármálastofnana.