Ástralska lögreglan handtók á miðvikudaginn 19 ára sjálfboðaliða í slökkviliði í New South Wales en hann er grunaður um að hafa kveikt sjö elda meðfram ströndum fylkisins. Hann sneri síðan aftur til starfsfélaga sinna til að hjálpa þeim að slökkva eldana sem hann hafði kveikt.

New South Wales hefur orðið illa úti í þeim miklu gróðureldum sem herja nú á Ástralíu og hafa gert síðan um miðjan október.

Lögreglan telur að maðurinn hafi kveikt eldana og síðan farið á brott til þess að koma aftur til að slökkva þá. Yfirmaður slökkviliðs fylkisins segir að unga manninum hafi umsvifalaust verið vikið frá störfum.

„Slökkviliðsmenn eru að vonum reiðir yfir að meintar gerðir eins manns geti eyðilegt orðspor þeirra og það mikla starf sem margir hafa lagt á sig. Hegðun sem þessi eru verstu svikin við okkur slökkviliðsmenn og samfélagið í heild.“

Sagði slökkviliðsstjórinn.

Staðfest hefur verið að sex manns hafi látist af völdum eldanna, mörg hundruð heimili hafa brunnið og rúmlega 1,5 milljónir hektara hafa orðið eldi að bráð.