Í tíu ár hafði Lestina-fjölskyldan búið í sama húsinu. En eftir að fjölskyldufaðirinn, Nick, gerði óhugnanlega uppgötvun í kjallara hússins flýtti hann sér út með börnin. Fjölskyldan hafði nýlega sett húsið á sölu en söluferlið tók óvænta stefnu þennan örlagaríka dag þegar Nick fór niður í kjallara.

„Enginn vill sjá þetta eða finna lyktina.“

Sagði hann í samtali við WHO-TV.

Kjallaragólfið var þakið blóði.

„Mér brá í fyrstu en ég hafði grun um hvaðan blóðið kom.“

Sagði Nick.

Á þeim tíu árum sem fjölskyldan hafði búið í húsinu hafði sláturhús verið rekið í næsta nágrenni. Nick grunaði strax að blóðið kæmi þaðan. Hann hringdi í heilbrigðiseftirlitið sem sagði fjölskyldunni að halda sig fjarri húsinu vegna hættu á að þau yrðu fyrir eitrun af völdum blóðsins. Talið er að starfsmenn sláturhússins hafi látið blóðið renna í niðurfall í gólfinu sem hafi síðan stíflast. Það varð til þess að blóð og kjötleifar komust inn í vatnsleiðslur Lestina-fjölskyldunnar.

Fjölskyldan býr nú hjá ættingjum. Reynt hefur verið að þrífa kjallarann en ekki er hægt að ljúka því verki því enn streymir blóð inn. Nick segist ekki hafa heyrt neitt frá fyrirtækinu sem á sláturhúsið annað en að það þvertaki fyrir að blóðið komi þaðan.