Mikil umferð einkennir lífið í Lúxemborg, sem er eitt ríkasta land heims, og hafa stjórnvöld nú ákveðið að grípa til aðgerða vegna þess. Frá og með næsta ári mun ekki kosta neitt að nota strætisvagna og lestir í þessu litla Evrópuríki. Endalausar umferðateppur eru stórt vandamál í landinu og gera lítið annað en ergja íbúana. Það er von stjórnvalda að margir muni nýta sér möguleikann á ókeypis samgöngum og þannig muni draga úr bílaumferðinni.

Þetta mun auðvitað einnig koma sér vel fyrir náttúruna og draga úr mengun. Hvergi í Evrópu er bílaeign meiri en í Lúxemborg en þar eru 662 bílar á hverja 1.000 íbúa en þeir eru 560.000 í heildina.

Það verður auðvitað ekki ókeyps að reka almenningssamgöngurnar en ríkissjóður mun taka þann kostnað á sig en hann er um 900 milljónir evra á ári segir í frétt New York Times um málið. Innkoman af miðasölu er um 30 milljónir evra á ári en einhver sparnaður næst þegar hætt verður að selja miða og kanna hvort fólk hafi keypt miða.

Eitt af stóru vandamálunum fyrir umferðina í landinu er nálægðin við Belgíu, Frakkland og Þýskaland. Lúxemborg er nokkurskonar tengipunktur fyrir umferð frá þessum löndum auk innanlandsumferðar.