Það er oft hægt að pirra sig á þeim sem fylgja ekki umferðarreglum og ef lögreglan grípur ekki inn í málin sleppa lögbrjótarnir yfirleitt við refsingu. En bíleigandi nokkur, sem lagði bíl sínum ólöglega, slapp svo sannarlega ekki við refsingu því hann fékk öðruvísi refsingu en sekt og kannski bara þyngri refsingu ef út í það er farið.

Ökumaðurinn var á leið í bíó í Temperley í Buenos Aires í Argentínu um síðustu helgi. Hann var seinn fyrir og til að spara sér tíma lagði hann bíl sínum þar sem innkaupakerrur stórverslunarinnar Coto eru geymdar. En því sá hann síðan eftir.

Samkvæmt frétt La Nacion þá var starfsfólk Coto búið að fá sig fullsatt af lagningum á borð við þessa. Þegar að ökumaðurinn kom út úr bíóinu brá honum heldur betur í brún því starfsfólk Coto hafði raðað innkaupakerrum í kringum bílinn þannig að hann var algjörlega innilokaður. Því beið hans töluverð vinna og barátta við að færa innkaupakerrurnar svo hann kæmist að bílnum og síðan á brott í honum.