Grunsemdir lögreglunnar vöknuðu eftir að sterk kannabislykt hafði legið yfir svæðinu í langan tíma. Bingósalurinn átti að hafa staðið auður síðan í janúar þegar fyrirtækið sem rak salinn lagði upp laupana, en svo var ekki.
The Sun var fyrst til að skýra frá þessu. Þann 16. júní réðist lögreglan í Northampton inn í bingósalinn, í ljós komu yfir 2.000 kannabisplöntur ásamt loftræstibúnaði og lömpum. „Þú getur reynt að fara af stað með svona risastóra ræktun, en þú munt ekki komast upp með það,“ segir Sean Marshall, hjá lögreglunni í Northamptonshire.
Um 25 lögregluþjónar réðust inn í bygginguna, þeir höfðu lögregluhunda með í för. Þeim brá við þá sýn sem mætti þeim.
„Þetta er einn stærsti fíkniefnafundur sem ég hef nokkurn tíma séð, fyrr á þessu ári var ég með í að finna 150 kannabisplöntur,“ segir Colin Gray, lögreglumaður á svæðinu í viðtali við The Sun.
Lögreglan segir að með þessum fundi hafi flæði fíkniefna á svæðinu minnkað.
„Þetta er mikilvægur fundur sem mun hindra framgang skipulagðrar glæpastarfsemi á svæðinu,“ segir Colin Grey við The Sun. Enginn hefur enn verið handtekinn í tenglsum við fundinn.
Lögreglan segir að nauðsynlegar rannsóknir muni fara fram á svæðinu áður en hægt verði að fjarlæga plönturnar. „Við munum eyða plöntunum og búnaðurinn verður eyðilagður svo að ekki verði hægt að nota hann aftur“ segir Sean Marshall hjá lögreglunni í Northamptonshire.
