Stjórnvöld í Sádi-Arabíu hyggjast koma sér upp kjarnakljúfi til orkuframleiðslu. Þetta fer ekki vel í bandarísk stjórnvöld sem óttast að þetta verði til að auka óstöðugleika í þessum heimshluta sem verður að teljast allt annað en öruggur.

Sádi-arabísk stjórnvöld hafa ekki látið sitja við orðin tóm í þessu máli og hafa þegar hafist handa við að verða sér úti um kjarnakljúf. Þau segja þetta nauðsyn til að mæta sífellt meiri orkuþörf og til að gera landið síður háð jarðeldsneyti.

Aðeins eru þrír mánuðir liðnir síðan tilkynnt var um þessar fyrirætlanir og nú þegar eru komnar útlínur af kjarnakljúf í útjaðri höfuðborgarinnar Riyadh. Miðað við gervihnattamyndir eru mikil umsvif á svæðinu. Alþjóðakjarnorkustofnunin telur að byggingu kjarnakljúfsins verði lokið á næstu 9 til 12 mánuðum.

Mohammed bin Salman, krónprins, hefur lagt áherslu að kjarnakljúfurinn sé aðeins til friðsamlegra nota en á síðasta ári sagði hann að ef Íran komi sér upp kjarnorkuvopnum muni Sádi-Arabía einnig gera það. Líklegt verður að teljast að hægt verði að nota nýja kjarnakljúfinn til að þróa kjarnavopn.

Mike Pompeo, utanríkisráðherra Bandaríkjanna, hefur miklar áhyggjur af þessari þróun.

„Við munum ekki líða að þetta gerist. Við viljum ekki leyfa svona löguðu að gerast nokkursstaðar.“

Sagði hann í samtali við CBS nýlega.