Einn félaga í þessum „klúbbi“ er ástralski blaðamaðurinn Ean Higgins. Hann hefur greinilega velt málinu mikið fyrir sér því nú hefur hann gefið út bók um málið en hún heitir „The Hunt for MH370“.
News.com.au skýrir frá þessu. Í bókinni eru settar fram fimm kenningar um örlög flugs MH370. Uppáhaldskenning Higgins er að flugmaður vélarinnar hafi viljað stinga af með ástkonu sinni og hefja nýtt líf undir nýjum nafni með henni.
Það er óhætt að segja að kenningin sé ísköld og vitni um algjört samviskuleysi flugmannsins, Zaharie Ahmad Shah, ef hún er rétt. Ef svo er þá stýrði Shah flugvélinni viljandi niður í Indlandshaf og drap þar með alla sem um borð voru. Áður hafði hann hoppað út úr flugvélinni í fallhlíf og siglt á brott í hraðbáti með ástkonu sinni. Þau eru síðan sögð hafa hafið nýtt líf undir nýjum nöfnum.
Kenningin var að sögn upphaflega sett fram af David Shrubb, sem er flugmaður hjá ástralska flugfélaginu Qantas. Hann segir að sú vitneskja sem er fyrir hendi styðji þessi kenningu.
Samkvæmt því sem fram kemur í bókinni hafði Shah átt margar ástkonur í gegnum tíðina en hafði orði mjög ástfanginn af konu sem stýrði öryggismálum á flugvellinum í Kuala Lumpur í Malasíu. Higgins segir að þau hafi ákveðið að láta sig hverfa saman með því að nota vel útfærða áætlun til að fela flóttann og slóð sína til að þau gætu hafið nýtt líf saman.
Hann segir að Shah hafi orðið sér úti um nýtt vegabréf með aðstoð glæpasamtaka. Hann hafi síðan stokkið út úr flugvélinni í fallhlíf og hafi ástkonan tekið á móti honum þegar hann lenti. Síðan hafi þau siglt á brott í hraðbát.
News.com.au hefur eftir Higgins að þetta sé uppáhaldskenningin hans því hún sé svo ótrúleg. Hann segir að margar kenningar séu á lofti um örlög vélarinnar en það sé hægt að útiloka þær nánast allar. Kenningarnar, sem hann setur fram í bókinni, séu hins vegar allar byggðar á fyrirliggjandi gögnum og staðreyndum.
