Það voru stórhuga fyrirætlanir hjá forsvarsmönnum Mars One Ventures AG fyrirtækisins þegar því var hleypt af stokkunum fyrir nokkrum árum. Senda átti fjóra menn og/eða konur til Mars 2026. Síðan átti að senda fólk þangað á hverju ári þar til fólk færi að eignast börn á Rauðu plánetunni. Auglýst var eftir áhugasömum sem vildu fara til Mars og sóttu 200.000 manns um að fá miða aðra leiðina þangað því ekki var gert ráð fyrir að það kæmi nokkru sinni aftur til jarðarinnar.

En nú eru þessi draumar brostnir, í bili að minnsta kosti, því Mars One Ventures AG hefur verið tekið til gjaldþrotaskipta að sögn Swiss Official Gazette of Commerce. Hollenski frumkvöðullinn og stofnandi fyrirtækisins, Bas Lansdorp, staðfesti þetta í samtali við Engadget. Hann sagði að verið væri að reyna að finna lausnir á málinu en ljóst sé að það þurfi meira fjármagn ef hægt á að vera að senda fólk til Mars.

Til stóð að fjármagna verkefnið með sölu á sjónvarpsrétti. Hugmyndin var að taka allt upp frá upphafi, valferlinu á geimförum og þar til þeir kæmu til Mars.