Útötuð í blóði stóð hún í íbúðinni þegar lögreglumennirnir komu á vettvang. Hún setti hendurnar aftur fyrir bak óumbeðin og sagði: „Handtakið mig.“ Þegar lögreglumennirnir spurðu hana af hverju ætti að handtaka hana svaraði hún bara: „Ég drap hana.“

Þetta gerðist í bænum Radford í Virginíu í Bandaríkjunum á fimmtudaginn. Þetta er lítill háskólabær og eru bæjarbúar í miklu áfalli eftir þennan hörmulega atburð. Luisa Cutting, 21 árs, var þá handtekin grunuð um að hafa orðið bestu vinkonu sinni, Alexa Cannon 20 ára, að bana í íbúð þeirra. Árásin var sérstaklega hrottafengin en Luisa notaði hníf til að bana vinkonu sinni.

Þegar lögreglumennirnir fóru inn í íbúð þeirra vinkvennanna fundu þeir Alexa látna en hún hafði verið stungin margoft. Enn hefur ekki verið skýrt frá hugsanlegum ástæðum fyrir morðinu og vinir og nágrannar sitja eftir og spyrja sig af hverju Luisa drap Alexa. Þær höfðu verið bestu vinkonur síðan þær hittust á fyrsta ári sínu í háskólanum 2016.