Það má kannski helst líkja ástandinu í ítalska bænum Gattolino, sem er í Cesena héraðinu í norðurhluta landsins, við hryllingsmynd. Þar hafa heilu rottuhjarðirnar herjað á bæjarbúa undanfarna daga við lítinn fögnuð.

„Þegar bíl er ekið eftir fáfarinni götu á kvöldin þjóta mörg hundruð rottur eftir malbikinu.“

Segir meðal annars í umfjöllun The Guardian um málið.

Íbúarnir í Gattolino segja þessa óvelkomnu gesti vera „geðveikar hvítar rottur“ vegna undarlegrar hegðunar þeirra. Þær hoppa fyrir bíla og einnig segir fólk að þær ráðist á hver aðra og drepi.

Yfirvöld í Cesena hafa sett sérstakan starfshóp á laggirnar til að takast á við rottupláguna. Í honum eru meðal annars slökkviliðs- og lögreglumenn auk heilbrigðisfulltrúa.

Ekki er vitað með vissu hvaðan allar þessar rottur koma en ein helsta kenningin er að þær komi frá stað þar sem áður var dúfnarækt en þar höfðu þær skjól og mat.

Með góðum vilja er hægt að þýða bæjarnafnið Gattolino sem „lítill köttur“ og af þeim sökum telja sumir bæjarbúar sig geta skýrt ákveðna hegðun hjá rottunum því þær stoppa margar hverjar við skiltið með bæjarnafninu og snúa við.

„Rottur eru ekki heimskar. Þær vita að litli kötturinn er ekkert lamb að leika sér við.“

Sagði einn bæjarbúinn.