Móðir James Bulger, tveggja ára pilts sem var numinn á brott úr verslunarmiðstöð í bænum Bootle á Englandi árið 1993 og myrtur á hrottafenginn hátt, er afar óhress við að mynd um atburðinn hafi verið tilnefnd til Óskarsverðlauna.

Málið er eitt umtalaðasta sakamál Bretlands en tveir tíu ára piltar, Robert Thompson og Jon Venables, játuðu að hafa myrt litla drenginn.

Myndin sem um ræðir, Detainment, var tilnefnd til Óskarsverðlauna sem besta stuttmyndin og varpar hún meðal annars ljósi á yfirheyrslur yfir piltunum. Ekkert samráð var haft við aðstandendur Bulger litla og er móðir hans, Denise Fergus, afar ósátt við það.

Denis sagði eftir að tilkynnt var um tilnefningarnar að það væri „ógeðfellt“ að tilnefna slíka mynd til æðstu verðlauna kvikmyndaheimsins. Sagði hún að það væri eitt að gera svona mynd án þess að hafa samband við aðstandendur og annað að þurfa að horfa upp á drengina lýsa síðustu andartökunum í lífi Bulger litla.

Drengirnir hittu Bulger í verslunarmiðstöð og hafði hann orðið viðskila við móður sína í eitt andartak. Þeir leiddu piltinn út úr verslunarmiðstöðinni og fannst lík piltsins við lestarteina í nágrenninu tveimur dögum eftir morðið.

Áður en tilkynnt var um tilnefningarnar var blásið til undirskriftarsöfnunar þar sem aðstandendur Óskarsverðlaunahátíðarinnar voru hvattir til að sniðganga myndina. Tæplega hundrað þúsund manns höfðu skrifað undir áskorunina.

Leikstjóri myndarinnar, Vincent Lamble, segist skilja það að aðstandendur Bulger séu ósáttir. „En að sama skapi vona ég að þau skilji að ástæða þess að myndin var gerð varð að varpa ljósi á hugarheim þessara tveggja pilta sem frömdu þennan hræðilega glæp. Hvað fær þá til að fremja þennan glæp? Ef við öðlumst ekki skilning á því er ég hræddur um að þetta muni endurtaka sig,“ segir hann.