Yfirvöld í ítalska bænum Sambuca de Sicilia, sem er á Sikiley, hafa nú sett fjölda húsa til sölu og er verð þeirra aðeins 1 evra en það svarar til um 140 íslenskra króna. Þarna er því hugsanlega gott tækifæri til að eignast hús á suðrænum slóðum og því engin þörf á að kaupa hótelgistingu þegar farið er í sólina.
CNN skýrir frá þessu. Fram kemur að mörg húsanna séu á fjallstoppum og þarafleiðandi fylgir ótrúlegt útsýni yfir þessa fallegu eyju sem er stundum sögð vera stærsta perla Miðjarðarhafsins.
Þetta ótrúlega húsnæðisverð er liður í áætlun yfirvalda um að „endurlífga“ bæinn en hann hefur eins og fleiri bæir á landsbyggðinni glímt við mikla fólksfækkun á undanförnum árum.
Bæjaryfirvöld setja þó eitt lítið skilyrði fyrir kaupum á hverju húsi. Kaupandinn þarf að gera endurbætur á húsinu sínu fyrir 15.000 evrur hið minnsta innan þriggja ára frá kaupum. Kaupendur þurfa einnig að leggja fram 5.000 evrur í tryggingu fyrir að þeir muni hressa upp á húsin. Tryggingin verður endurgreidd þegar endurbótum er lokið. Húsin eru flest 40 til 150 fermetrar og mörg þeirra eru í slæmu ásigkomulagi.
CNN segir að Sambuca di Sicilia sé ekki fyrsti ítalski bærinn sem reynir að laða fólk til sín með svona dúndurtilboði en það er nýjung að nú er hægt að kaupa hús samstundis því bæjarsjóður á öll húsin. Bæjaryfirvöld segja að tilboðið hafi nú þegar vakið athygli um allan heim og útlendingar streymi til hans til að kanna aðstæður.
Áhugasamir geta sent tölvupóst á netfangið case1euro@comune.sambucadisicilia.ag.it til að fá nánari upplýsingar.
