Það er komið að því eftir áralanga stöðnun að stækka Danmörku. Níu eyjar munu bætast við landið á næstu árum. Danir hyggjast þó ekki leggja í hernað til að sækja sér land heldur ætla þeir að búa til eyjar við Kaupmannahöfn. Á þessum eyjum á að vera ýmis atvinnustarfsemi þar sem allt að 12.000 manns munu starfa.

Eyjarnar verða gerðar utan við Avedøre Holme en um þrjár milljónir fermetra lands verða gerðar með þessu. Ríkisstjórnin kynnti þessa áætlun sína í gær. Verkið á að hefjast 2022 og ljúka um 2040. Fram kom að einnig á að flytja Lynetten, stærsta vatnshreinsunarkerfi Kaupmannahafnar, á eina af þessum nýjum eyjum. Þannig er hægt að slá tvær flugur í einu höggi því Lynetter stendur í vegi fyrir öðru stóru þróunarverkefni í borginni, Lynetteholm, þar sem á að reisa nýtt íbúðarhverfi fyrir 35.000 manns.