Nú sitja 12 Albanir á sakamannabekk hjá undirrétti í Kaupmannahöfn en þeir eru ákærðir fyrir að hafa brotist inn í fjölda einbýlishúsa og að hafa stolið þaðan munum að verðmæti um 9 milljóna danskra króna en það svarar til um 160 milljóna íslenskra króna. Það voru aðallega skartgripir og úr sem þeir sóttust eftir en auk þess stálu þeir ýmsu öðru, þar á meðal hljóðnema, barnahnífapörum og píanói!
Saksóknari krefst þungra fangelsisdóma yfir mönnunum og að þeim verði vísað úr landi að afplánun lokinni. Hann segir að þjófarnir hafi kannski reynslu af að margir séu ekki með þjófavarnarkerfi nema á fyrstu hæð þar sem mestu verðmætin eru oft geymd. Á annarri hæð geymi fólk hins vegar oft skartgripi og því sé oft eftir miklu að slægjast þar.
Flest húsanna, sem mennirnir eru ákærðir fyrir að hafa brotist inn í, eru í hverfum þar sem efnað fólk býr. Sumir þeirra hafa játað sök en aðrir þvertaka fyrir að hafa átt hlut að máli. Reiknað er með að dómur verði kveðinn upp í október.
Lögreglan sá að ákveðið mynstur var í innbrotunum, sérstaklega þegar þau fóru nær algjörlega að vera nærri lestarteinum. Í lok október var miklum verðmætum stolið í innbroti í hús á Friðriksbergi en verðmætið var sem nemur um 8 milljónum íslenskra króna. Þegar lögreglumenn skoðuðu upptökur frá nærliggjandi lestarstöð sáu þeir tvo menn með ferðatösku eins og var stolið úr umræddu húsi. Lögreglan gat fylgst með ferðum mannanna á upptökum eftirlitsmyndavéla dönsku járnbrautanna og fann þannig hótelið sem þeir gistu á. Í framhaldinu var leitað í sex herbergjum á hótelinu og 12 Albanir handteknir. Við leitina fundust verkfæri, skartgripir, úr og margt fleira.
